O‘zbekiston-Koreya: biznes muloqoti

Joriy yilning 13 dekabr kuni «Panarams Radisson” mehmonxonasida O‘zbekiston Respublikasi vazirlik va idoralar vakillari ishtirokida Koreyalik yetakchi investorlar bilan uchrashuv bo‘lib o‘tdi.

Uchrashuv O‘zbekiston Savdo-sanoat palatasi hamda Koreyaning O‘zbekistondagi elchixonasi bilan hamkorlikda tashkil etildi. Uchrashuvning asosiy maqsadi 100 ta Koreya korxonalari o‘rtasida o‘tkazilgan so‘rovnomada ular tomonidan bildirilgan muommolarni muhokama qilish va hal etishga bag‘ishlangan.

Tadbirni Koreya Respublikasining O‘zbekistondagi elchisi Kim Xi Sang va O‘zbekiston Savdo-sanoat palatasi raisi Davron Vahobov kirish so‘zi bilan ochdi.

Davron Vahobov o‘z chiqishida so‘nggi yillarda Koreya va O‘zbekiston o‘rtasidagi savdo-iqtisodiy, investitsiyaviy hamkorlik yangi darajaga ko‘tarilganini, Koreya Respublikasi O‘zbekiston bilan tashqi savdo aylanmasi hajmi eng katta bo‘lgan davlatlar top 5 taligiga kirishini va bugungi kunda O‘zbekiston Respublikasida Koreya kapitali ishtirokida 930 ta korxona faoliyat ko‘rsatayotganini, shundan 380 ta qo‘shma korxona va 550 ta 100 foiz Koreya kapitali asosida faoliyat olib borayotgan xorijiy korxonalar ekanligini taʼkidladi.

Ushbu korxonalar faoliyatining asosiy yo‘nalishlari: savdo, transport va logistika, axborot texnologiyalari, turli xizmatlar ko‘rsatish, qurilish va boshqalar.

Aytib o‘tish joizki, O‘zbekiston Respublikasi Savdo-sanoat palatasi va Koreyaning qator tashkilotlari, shu jumladan, Koreya Xalqaro hamkorlik agentligi, Koreya xalqaro savdo uyushmasi, “Koreya-Markaziy Osiyo” hamkorlik forumi kotibiyati o‘rtasidagi o‘zaro hamkorlikni yanada rivojlantirish maqsadida o‘zaro tashriflar va turli ko‘lamdagi loyihalar amalga oshirilmoqda.

2022 yil yanvar-sentabr holatiga ko‘ra mamlakatlarimiz o‘rtasidagi savdo aylanmasi 1,8 mlrd. AQSH dollarini tashkil etib, 2021 yildagi ko‘rsatkichga nisbatan 5,1%ga o‘sdi. Bunda, transport, qurilish, to‘qimachilik, kimyo, oziq-ovqat sohalarini alohida qayd etish lozim.

Koreyalik ishbilarmonlar O‘zbekistonda so‘nggi yillarda tizimli ravishda maqsadli iqtisodiy islohotlar amalga oshirilayotganini, shu jumladan, xorijiy investitsiyalarni jalb etish borasida bir qator huquqiy va moliyaviy imkoniyatlar yaratilib, Respublikaning investitsiyaviy jozibadorligini oshirish choralari amalga oshirilayotganini taʼkidladi.

Shu bilan birga, Koreyalik investorlar o‘z faoliyatida uchrayotgan baʼzi bir muammolarni bayon qildi. Bildirilgan muammolarning aksariyati tadbir davomida tegishli vazirlik va idoralar tomonidan hal etildi, ayrim masalalar bo‘yicha esa topshiriqlar berildi.

Ushbu formatdagi uchrashuvlar Koreyalik investorlarning O‘zbekistonda muvaffaqiyatli faoliyat yuritishi uchun yanada qulay shart-sharoitlar yaratish, shuningdek, ikki davlat ishbilarmon doiralari o‘rtasida hamkorlik aloqalarini o‘rnatish va mustahkamlash uchun imkoniyatlarini o‘rganishda o‘zining yuqori natijasini ko‘rsatadi.

SSP matbuot xizmati