O‘zbekistonlik tadbirkorlar Bursada bo‘lib o‘tgan ko‘rgazmada qatnashdi

O‘zbekiston Savdo-sanoat palatasi boshchiligida o‘zbekistonlik ishbilarmon doira vakillari joriy yilning 11-14-yanvar kunlari Turkiyaning Bursa shahrida bo‘lib o‘tgan “JUNIOSHOW” bolalar va chaqaloqlar uchun kiyim-kechak va zarur buyumlar xalqaro ko‘rgazmasida qatnashdi.

Bursa Savdo-sanoat palatasining (BTSO) sho'ba korxonasi KFA Fair tashkiloti tomonidan tashkil etilgan JUNIOSHOW ko‘rgazmasi Tadbirkorlar uyushmasi (BEKSİAD) va bolalar kiyim-kechaklari ishlab chiqaruvchilari bilan hamkorlikda o'tkazildi.

To‘qimachilik poytaxti Bursadagi ko‘rgazmada butun dunyodan to‘qimachilik sanoatining yirik korxonalari yig‘ilib, ko‘rgazma ishtirokchilari xalqaro maydon tashrif buyuruvchilari e’tiboriga ham dizayn, ham innovatsiyaga yo‘naltirilgan maxsus dekorativ stendlari bilan o‘zlarining bahor-yozgi bolalar kiyimlari konseptual ijod namunalari va kolleksiyalarini taqdim etdi.

Ushbu ko‘rgazmada dunyoning 71 davlatidan 30 000 ga yaqin shu sohaning chakana va ulgurji savdosi vakillari qatnashdi. Shu jumladan O‘zbekistondan ham 20 ga yaqin vakillar ushbu ko‘rgazmada qatnashib, shartnomalar tuzishdi.

SSP matbuot xizmati