Toshkentda «Franchising Expo Uzbekistan» Xalqaro franchayzing ko'rgazmasi boʻlib oʻtdi

Joriy yilning 15-18 mart kunlari «International Hotel Tashkent” mehmonxonasida Toshkentda ilk bor “Franchising Week Uzbekistan” franchayzing haftaligi bo‘lib o‘tadi. Ushbu haftalik doirasida O‘zbekiston Savdo-Sanoat palatasi ko‘magida 16-mart kuni “Franchising Expo Uzbekistan” ko‘rgazmasi bo‘lib o‘tdi.

Franchising Expo Uzbekistan ko‘rgazmasi – franchayzerlar va potensial franchayzerlar uchun yirik platforma hisoblanadi. Tashkilotchilarning asosiy maqsadi – O‘zbekistonda franchayzing tarmoqlarini rivojlantirish va o‘zbek brendlarini xalqaro miqyosga olib chiqib, jahon miqyosida keng tanitish imkoniyatlarini yaratishdir.

Ko‘rgazmaning rasmiy ochilishi O‘zbekiston Savdo-sanoat palatasi vakili va O‘zbekiston franchayzing Assotsiatsiyasi prezidenti Murat Aʼzamov ishtirokida bo‘lib o‘tdi.

Ko‘rgazmada 10 ta davlatning 100 dan ortiq faol xorijiy va mahalliy franchayzing tarmoqlari, xususan, umumiy ovqatlanish biznesi, oziq-ovqat chakana savdosi, moda chakana savdosi, ishlab chiqarish, taʼlim sohasi, go‘zallik va salomatlik sohasidagi franshizalar ishtirok etdi.

Qolaversa, ko‘rgazma doirasida 30 dan ortiq yetakchi xalqaro ekspertlar, franchayzing orqali katta daromadga erishgan muvaffaqiyatli tadbirkorlar, shuningdek, davlat idoralari, yirik franchayzing tarmoqlari va qo‘llab-quvvatlash institutlari vakillari ham nutq so‘zlab, o‘z tajribalari bilan bo‘lishdi.

Tashrif buyuruvchilar biznesining ishonchli va manfaatli franshizalari haqida maʼlumotga ega bo‘ldi va franshizalar bozorining so‘nggi yangiliklari bilan tanishdi.

Tadbirda O‘zbekistondagi franchayzing bozorining istiqbollari, franchayzing bozoriga tezkor kirish va franchayzingni to‘g‘ri tanlash yo‘llari, biznes uchun zamonaviy IT vositalar, franchayzingning afzalliklari va o‘zbek brendlarini jahon darajasiga olib chiqish imkoniyatlari muhokama qilindi.

Ushbu ko‘rgazma franchayzerlar va franshiza xarid qiluvchilar uchun manfaatli biznes hamkorlik o‘rnatish va barqaror o‘sayotgan mijozlarni topish uchun katta imkoniyat bo‘ladi.

SSP matbuot xizmati