Savdo-sanoat palatasining turizm sohasini transport vositalari bilan taʼminlash borasidagi takliflari Davlat rahbari tomonidan maʼqullandi

Avval xabar berilganidek, Savdo-sanoat palatasida O‘zbekiston Turizm transporti uyushmasining murojaati asosida huquqiy masalalar bo‘yicha Ekspertlar kengashi yig‘ilishi o‘tkazilib, unda:

turistik avtobus va mikroavtobuslarni O‘zbekiston Respublikasiga olib kirishda imtiyozlarning qo‘llanilishi;

mamlakatda turistik avtobus va mikroavtobuslar harakatini kengaytirish imkoniyatlari, xususan transport infratuzilmasini yaxshilash muammolari muhokama qilindi.

Ushbu muammolar yuzasidan quyidagi takliflar ishlab chiqildi: 

• turistik avtobus va mikroavtobuslarni O‘zbekiston Respublikasiga olib kirishda qo‘shimcha imtiyozlar berish;
• Bo‘stonliq tumanining 4R6-avtomobil yo‘li bo‘ylab Chimyon, Bildirsoy, G‘azalkent, Chorvoq va Yusupxona hududlariga;
• Namangan viloyatidan Toshkent viloyatiga o‘tuvchi “Qamchiq” dovonida (A-373 avtomobil yo‘li);
• Jizzax viloyatidan Samarqand viloyatiga olib boruvchi M-39 avtomagistrali (Sharof Rashidov va G‘allaorol tumanlaridagi 31 km.lik) yo‘lida turistik avtobus va mikroavtobuslar qatnovini yo‘lga qo‘yishga ruxsat berish.

Yig‘ilishda ishlab chiqilgan takliflar O‘zbekiston Respublikasi Vazirlar Mahkamasi hamda tegishli vazirlik va idoralarga yuborilgan edi.

Joriy yil 29 martda O‘zbekiston Respublikasi Prezidenti raisligida mamlakatimiz turizm salohiyatini jadal rivojlantirish yuzasidan o‘tkazilgan videoselektor yig‘ilishida ushbu takliflar to‘liq qo‘llab-quvvatlandi.

Xususan:

• 1 apreldan turoperator, mehmonxona va tashuvchilarga 10 va undan ortiq o‘rindiqli hamda ishlab chiqarilganiga 5 yildan ortiq bo‘lmagan avtotransportni olib kirishda bojxona imtiyozlari berilishi;
• 10 apreldan xavfsizlik choralarini ko‘rib, “Qamchiq” dovoni orqali turistik mikroavtobus (15 kishigacha), Jizzax dovoni, Chimyon va Chorvoqda turistik avtobus va mikroavtobuslar qatnovini yo‘lga qo‘yishga ruxsat berilishi taʼkidlandi.

SSP matbuot xizmati