“Tadbirkor – O‘zbekiston” jurnalining ilk soni taqdimot marosimi bo‘lib o‘tdi

11 aprel kuni “Hilton Tashkent City” mehmonxonasida 30 aprel – umumxalq referendumi kuni xamda O‘zbekiston Savdo-sanoat palatasi tomonidan tashkil etilgan “Tadbirkor – O‘zbekiston” jurnalining ilk soni taqdimot marosimi bo‘lib o‘tdi. Ushbu tadbirda yurtimizning eng ilg‘or 400 nafarga yaqin tadbirkorlari ishtirok etdi.

Tadbirni O‘zbekiston Savdo-sanoat palatasi raisi Davron Vahobov chiqish so‘zi bilan ochib berdi. O‘z chiqishida Palata raisi so‘nggi yillarda tadbirkorlik faoliyatiga qulay biznes muhitini yaratishga qaratilgan islohotlar tizimli ravishda amalga oshirilayotganligini va olib borilayotgan islohotlar natijasida har yili o‘rtacha 100 mingga yaqin yangi tadbirkorlik subyektlari tashkil etilayotganini va hozirda ularning soni 650 mingdan ortganini taʼkidladi.

Xorijiy investorlar ham mamlakatimizda amalga oshirilayotgan islohotlarga ishonch bildirib, o‘z investitsiyalari bilan iqtisodiyotning rivojlanishida ishtirok etmoqda. Xususan, so‘nggi 5 yilda xorijiy investitsiya ishtirokidagi korxonlar soni 3 marotaba oshib, 14 mingtadan ortiqni tashkil etdi.

Qolaversa, tadbirda yurtimizning ilg‘or va yetakchi tadbirkorlari, jumladan, “M-FAKTOR” MCHJ taʼsischisi Hasan Mamasaidov, Farg‘ona viloyatidagi “Fergana Global Textile” MCHJ paxta-to‘qimachilik klasteri taʼsischisi Muzaffar Razzoqov, “Koç Construction” rahbarining o‘rinbosari Ilker Dogrul, Buxoro viloyatidagi “Arziman bonu chorvasi” fermer xo‘jaligi raisi Gulmurod Umarov, shuningdek, Surxondaryo viloyatidagi “Termiz Golden City” MCHJ rahbari Jamshid Pardayevlar ham so‘zga chiqib, mamlakatimizda tadbirkorlar manfaati yo‘lida bir qator ijobiy o‘zgarishlar amalga oshirilayotganini va tadbirkorlik faoliyatiga qulay biznes muhitini yaratishga qaratilgan islohotlar samarali natija berayotgani to‘g‘risida taʼkidladi.

Aytib o‘tish joizki, tadbirkorlik faoliyatining fundamental va hal qiluvchi asoslari, yaʼni mulk himoyasi va erkinlik kafolatlari yangilanayotgan Konstitutsiyada oliy huquqiy kuch darajasiga ko‘tarilmoqda.

Oddiy aytganda, tadbirkorlik faoliyatining tamal toshlari hisoblangan mulk va erkinlik bevosita Konstitutsiya himoyasiga olinmoqda.

Shuningdek, tadbirda O‘zbekiston Savdo-sanoat palatasi tomonidan tashkil etilgan “Tadbirkor – O‘zbekiston” jurnalining ilk soni taqdimot marosimi bo‘lib o‘tdi.

O‘zbekiston Respublikasi Prezidentining 2022 yil 19 avgustdagi “Faol tadbirkor” ko‘krak nishonini taʼsis etish to‘g‘risida”gi PQ-356-son qaroriga asosan har yili 20 avgust – Tadbirkorlar kuni arafasida “Faol tadbirkor” ko‘krak nishoni bilan taqdirlangan tadbirkorlik subyektini o‘zida aks ettirgan kitob chop etib borilishi belgilangan. 

Qaror ijrosini taʼminlash, shuningdek, 2022 yilda turli darajadagi mukofotlar bilan taqdirlangan mahalliy tadbirkorlik subyektlari hamda mamlakatimiz iqtisodiyotiga investitsiyalar kiritib, iqtisodiy o‘sish surʼatlariga o‘z hissasini qo‘shib kelayotgan xorijiy mamalakatlar ishbilarmon doiralari vakillarining faoliyatini yoritish maqsadida ushbu “Tadbirkor – O‘zbekiston” jurnali tayyorlandi.

Ilg‘or natijalarga erishgan, ishlab chiqarish, xizmat ko‘rsatish va xo‘jalik yuritishning boshqa sohalarida tashabbus ko‘rsatayotgan, mamlakatimiz iqtisodiy salohiyatini yanada mustahkamlashga, import o‘rnini bosuvchi va eksportbop mahsulotlar ishlab chiqarishga, hududlarni ijtimoiy-iqtisodiy rivojlantirish va aholi bandligini taʼminlashga o‘zining munosib hissasini qo‘shayotgan, tadbirkorlarning faoliyatini ushbu jurnalda yoritib borish maqsad qilingan.

Tadbir yurtimiz tadbirkorlari uchun tashkil etilgan iftorlik dasturxoni bilan yakunlandi. 

SSP matbuot xizmati