Tadbirkorlar faoliyatidagi muammolar tahlil qilindi

Mamlakatimiz iqtisodiyotida tadbirkorlik subyektlari faoliyati tobora rivojlanib, tadbirkorlar tomonidan ishlab chiqarilayotgan mahsulotlar va koʼrsatilayotgan xizmatlar ulushi tobora oʼsib borayotgan bir vaqtda, iqtisodiyotimiz rivojiga jiddiy gʼov solayotgan davlat organlari bilan oʼzaro munosabatlarda uchrayotgan korruptsiya illatiga nisbatan tadbirkorlarning munosabati ahvoli tahlil qilib borish muxim ahamiyat kasb etmoqda.

“Oʼzbekiston Respublikasi Savdo-sanoat palatasi toʼgʼrisida”gi Qonunining 23-moddasida davlat organlarining, shu jumladan huquqni muhofaza qiluvchi va boshqa organlarning tadbirkorlik subʼektlarining huquqlari hamda qonuniy manfaatlarini himoya qilish va taʼminlash sohasidagi faoliyati toʼgʼrisida tadbirkorlik subʼektlari oʼrtasida soʼrov oʼtkazish hamda ularning fikr-mulohazalarini tahlil qilish vazifasi yuklatilgan.

Shu bois, Oʼzbekiston Savdo-sanoat palatasi tomonidan 2023 yilning birinchi choragi mobaynida joylarda tadbirkorlik subʼektlari faoliyatida vujudga kelayotgan tizimli muammolar, ularning faoliyatiga noqonuniy aralashuvlar, korruptsion munosabatlarga toʼqnash kelish kabi masalalar holatini oʼzida aks ettiruvchi anonim va onlayn soʼrovnoma oʼtkazildi va natijalari tahlil qilindi.

Tadbirkorlik subʼektlari faoliyatida vujudga kelayotgan tizimli muammolarni oʼrganish boʼyicha oʼtkazilgan soʼrovnomada 2490 ta tadbirkorlik subyektlari vakillari ishtirok etib, oʼz fikr-mulohazalarini bayon qilishdi.

Soʼrovnomada ishtirok etgan tadbirkorlarning aksariyati MChJ (748 ta) va YaTT (457 ta) shaklida faoliyat yuritmoqda, shundan MChJlarning asosiy qismi Toshkent shahri (99 ta) va Fargʼona vodiysi viloyatlarida joylashgan (240 ta). YaTTlarning asosiy qismi Toshkent (111), Fargʼona (48), Sirdaryo (41), Аndijon (45) va Buxoro (41) viloyatlari hissasiga toʼgʼri kelmoqda.

Soʼrovnoma jarayonida tadbirkorlar ayrim savollarga quyidagicha javob berishgan, xususan, “Tadbirkorlik faoliyatini amalga oshirish jarayonida korruptsion holatga duch kelganmisiz?" – degan savolga respondentlarning 58,8 % “xech qachon” javobini berishgan.

“Sizningcha, soʼnggi bir yil davomida Siz yashab kelayotgan tuman(shahar)da korruptsiya darajasi oʼzgardimi?" – degan savolga respondentlarning 66,6% “kamaydi” javobini berishgan.

"Oxirgi bir yil davomida tadbirkorlik faoliyatini amalga oshirish jarayonida mansabdor shaxslarga norasmiy toʼlov yoki sovgʼa qilishga majbur boʼlganmisiz?" – degan soʼrovga respondentlarning 80,4% “yoʼq” deb javob qaytarishgan.

Xulosa oʼrnida shuni taʼkidlash lozimki, soʼnggi yillar davomida korruptsiyaga qarshi murosasiz kurash olib borilayotganligi, bu boradagi samarali profilaktik tadbirlar natijasida tadbirkorlarda bu illatga nisbatan mustahkam immunitet tobora shakllanib bormoqda, bugungi kunda aksariyat tadbirkorlar korruptsion holatlarga duch kelmayotganliklarini taʼkidlashmoqda, ularning fikricha, soʼnggi bir yil ichida mamlakatimizda korruptsiya darajasi kamaygan.

Ushbu esa yurtimiz iqtisodiyotining tayanchi boʼlmish tadbirkorlik faoliyati uchun tobora shaffor va adolatli muhit yuzaga kelayotganligining yaqqol isbotidir.

Biroq bank sohasida, litsenziya olishda va yer maydonlarini ajratishda hanuzgacha korruptsiya darajasi yuqoriligi ushbu yoʼnalishlarda korruptsiya qarshi kurashishni izchil davo ettirishni taqozo qilmoqda.

SSP matbuot xizmati