“Turkiy davlatlar o‘rtasida temir yo‘l transporti bog‘liqligi: Farg‘ona vodiysi – Anadolu” Xalqaro forumi bo‘lib o‘tdi

O‘zbekiston Respublikasining Turkiy davlatlar tashkilotiga raisligi doirasida tashkil etilgan tadbirda viloyat hokimi Xayrullo Bozorov, Turkiy davlatlar tashkiloti Bosh kotibi o‘rinbosari Mirvohid Azimov, Tashkilotga a’zo davlatlar temir yo‘llari idoralari mutasaddilari, o‘z kargo terminaliga ega yirik logistika markazlari vakillari, eksportyorlar hamda ishlab chiqaruvchi korxonalar rahbarlari ishtirok etdi.

Markaziy Osiyoning uch mamlakatini qamragan Farg‘ona vodiysi hamda Turkiyagacha bo‘lgan hudud o‘rtasidagi temir yo‘llarda yuk tashish hajmini oshirish imkoniyatlari hamda bu borada hal etilishi lozim bo‘lgan masalalar atroflicha muhokama qilindi.

2022 yilning noyabr oyida Samarqandda bo‘lib o‘tgan Turkiy davlatlar tashkiloti prezidentlarining sammiti doirasida yangi transport tranzit koridorlarini yo‘lga qo‘yish va rivojlantirish bo‘yicha kelishuvga erishilgan edi. Bugungi forum, ushbu kelishuv doirasidagi amaliy sa’y-harakatlar hamda kelgusi aniq rejalarni belgilovchi tadbir bo‘ldi.

Tadbirning ochilishida so‘z olgan viloyat hokimi Xayrullo Bozorov Turkiy davlatlar o‘rtasida transport-logistika tizimining rivojlanishi, shu jumladan, temir yo‘l transporti jihatidan o‘zaro bog‘liqlikning mustahkamlanishi, har tomonlama iqtisodiy taraqqiyotga yo‘l ochishini qayd etib, qo‘shni davlatlar bilan o‘zaro savdo hajmini keskin oshirishga imkon berishiga e’tibor qaratdi. Mintaqada amalga oshirishga kirishilayotgan “Xitoy-Qirg‘iziston-O‘zbekiston” temir yo‘li qurilishi ham, barcha Markaziy Osiyo davlatlarining transport va tranzit salohiyatini oshirishini ta’kidlagan viloyat hokimi, ushbu magistral O‘zbekistonni Yevropa bilan bog‘lashda muhim o‘rin tutishini bildirdi.

Farg‘ona vodiysi va Anadolu o‘rtasidagi joylashgan davlatlarni bog‘laydigan uchta yo‘nalish – Transkaspiy yo‘lagi, Janubiy va Shimoliy yo‘nalishda temir yo‘l yuk tashishlari hajmini rivojlantirish asosiy maqsad ekanini qayd etgan Turkiy davlatlar tashkiloti Bosh kotibi o‘rinbosari Mirvohid Azimov, buning uchun logistika sohasida ishlaydigan kompaniyalar, logistik markaz vakillarini xususiy sektor bilan bog‘lab eksport-import jarayoniga qulay platforma yaratish yo‘lida ish olib borilayotganini ta’kidladi.