Tadbirkorlik kodeksi loyihasi muhokama qilindi

Joriy yilning 13 may kuni O‘zbekiston Savdo-sanoat palatasi binosida Palata raisi Davron Vaxabov ishtirokida O‘zbekiston Respublikasi Prezidenti huzuridagi Tadbirkorlikni qo‘llab-quvvatlash bo‘yicha jamoatchilik kengashining navbatdagi yig‘ilishi bo‘lib o‘tdi.

Kengash yig‘ilishida O‘zbekiston Respublikasi Tadbirkorlik kodeksi loyihasi muhokama qilindi.

Tadbirkorlik kodeksi loyihasi 2017–2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Yoshlarni qo‘llab-quvvatlash va aholi salomatligini mustahkamlash yili”da amalga oshirishga oid davlat dasturining 84-bandi ijrosini ta’minlash maqsadida ishlab chiqilgan. 

Bugungi kunda tadbirkorlik faoliyatini tartibga soluvchi 2000 dan ortiq qonunchilik hujjatlari mavjud bo‘lib, ularni qo‘llash bilan bog‘liq qiyinchiliklar tug‘ilmoqda.

Shu bois, Tadbirkorlik kodeksi loyihasida 100 dan ortiq qonunchilik hujjatlarini unifikatsiya qilish ko‘zda tutilmoqda. Ularning 11 ta qonun hamda 11 ta qonun osti hujjatlari bo‘lib hisoblanadi. Kodeksning asosiy vazifalari jismoniy va yuridik shaxslarning tadbirkorlik faoliyatida erkin ishtirok etishi va undan manfaatdor bo‘lishi uchun kafolatlar hamda sharoitlar yaratishdan, xususiy mulk, shuningdek, tadbirkorlik subyektlarining huquqlari va qonuniy manfaatlarini himoya qilishdan iborat.

Mazkur yig‘ilishda O‘zbekiston Respublikasi Prezidenti Administratsiyasi, O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha Vakil o‘rinbosari, O‘zbekiston Respublikasi Prezidenti huzuridagi Tadbirkorlikni qo‘llab-quvvatlash bo‘yicha jamoatchilik kengashi a’zolari, shuningdek, Adliya, Iqtisodiyot va moliya vazirliklari, Bosh prokuratura xodimlari hamda turli sohalarda faoliyat ko‘rsatib kelayotgan  faol tadbirkorlik subyektlari hamda ekspertlar ishtirok etishdi.

Yig‘ilish qizg‘in muhokama shaklida o‘tib, tadbirkorlikning huquqiy himoyasini ta’minlash masalalariga doir fikr-mulohazalar eshitildi, loyihaning tegishli qismlarini qayta ko‘rib chiqishga kelishildi.

Ta’kidlash joizki, kodeks loyihasi O‘zbekiston Respublikasi “Savdo-sanoat palatasi to‘g‘risida”gi Qonunida ko‘zda tutilgan vakolat doirasida o‘rganib chiqilib, tegishli takliflar loyiha mualliflariga taqdim qilingan.

Tadbirda ishtirokchilar ushbu loyihani yana bir bor ko‘rib chiqish, uning har bir moddasi bo‘yicha o‘z takliflarini hamda e’tirozlarini bildirish va muhokama qilish imkoniga ega bo‘ldilar.

SSP matbuot xizmati