Savdo-sanoat palatasida Janubiy Koreya delegatsiyasi bilan uchrashuv bo‘lib o‘tdi

Joriy yilning 17 may kuni Savdo-sanoat palatasida “UAIDE” kompaniyasi direktori Li Bom Xi boshchiligidagi Janubiy Koreya delegatsiyasi bilan uchrashuv boʻlib oʻtdi. Unda Koreyadagi turli universitetlar vakillari ham ishtirok etdi.

Tashrifdan koʻzlangan asosiy maqsad ikki mamlakat tadbirkorlik subyektlari o'zaro hamkorligi uchun imkoniyatlar yaratish, shuningdek, Oʻzbekiston ishbilarmon doiralariga Janubiy Koreyaning texnologiya va IT sohasidagi tajribasini oʻrganishga koʻmaklashishdan iborat.

M.Adilov O‘zbekiston korxonalari Koreya bilan hamkorlik qilishdan, shuningdek, robototexnika va umuman texnologiya sohasida yetakchilardan biri bo‘lgan ushbu mamlakat tajribasini o‘zlashtirishdan manfaatdor ekanini ta’kidladi.

Shuningdek, M.Adilov hamkorlar topish va ular oʻrtasida muzokaralar olib borish jarayonini soddalashtirish maqsadida Oʻzbekiston va Koreya tadbirkorlari uchun yagona platforma yaratish imkoniyatlarini koʻrib chiqishni taklif qildi.

Janob Li Bom Xi, oʻz navbatida, koreyalik tadbirkorlar tajribasidan kelib chiqib, platformalar orqali hamkorlar topish, tovarlar bilan tanishish va muzokaralar olib borish chinakamiga vazifani osonlashtirishini qayd etdi, biroq kelajakda tomonlar jonli aloqa oʻrnatishi kerakligini taʼkidladi.

Shuningdek, xorijiy tomon platformani ishlab chiqish va hamkorlik imkoniyatlarini kengaytirish uchun Koreya ishbilarmon doiralarini jalb qilishga tayyorligini qayd etdi.

Uchrashuv davomida mehmonlar Savdo-sanoat palatasining faoliyati, respublikamizdagi tadbirkorlik imkoniyatlari bilan ham tanishtirildi.

Uchrashuv yakunida Oʻzbekiston Savdo-sanoat palatasi va Koreyaning “UAIDE” kompaniyasi, shuningdek, Oʻzbekiston Savdo-sanoat palatasi va Koreyaning Changvon Milliy universiteti oʻrtasida oʻzaro anglashuv memorandumi imzolandi.

SSP matbuot xizmati