Oʼzbekiston-Turkiya: B2B formatida ikki tomonlama muzokaralar bo‘lib o‘tdi

Joriy yilning 20 iyun kuni Turkiya eksportchilar assambleyasi (TIM) boshchiligida Turkiyaning turli sohalardagi 33 ta kompaniyasining O‘zbekistonga tashrifi doirasida Toshkent shahrida B2B formatida ikki tomonlama muzokaralar bo‘lib o‘tdi. 

Tadbir O‘zbekiston Savdo-sanoat palatasi, Turkiya savdo vazirligi hamda Turkiya eksportchilar assambleyasi tomonidan o‘tkazildi.

Turkiya eksportchilar assambleyasi  (TIM)  -  Turkiyaning tashqi savdosiga rahbarlik qilish, eksport siyosatini belgilash, bozor xilma-xilligini rivojlantirish va eksportchilarning xalqaro bozordagi raqobatini rivojlantirish maqsadida tashkil etilgan. Muassasaning asosiy vazifasi tashqi savdoning barqaror hajmini oshirish, hamkor davlatlar bilan ikki tomonlama savdo, ijtimoiy va madaniy aloqalarni rivojlantirishdan iborat. 

Assambleya mamlakat iqtisodiyoti va eksportini rivojlantirish bo‘yicha strategik rejalarni tayyorlaydi va hukumatga taklif beradi, eksport strategiyasi, innovatsion strategiya, inkubatsiya markazlari kabi muhim tadqiqotlarni muvofiqlashtiradi.

Tadbir Turkiya Respublikasining O‘zbekistondagi Favqulodda va muxtor elchisi Olgan Bekar, Turkiya eksportchilar assambleyasining xalqaro masalalar bo‘yicha a’zosi Ismail Yilmaz, O‘zbekiston Savdo-sanoat palatasi Raisining birinchi o‘rinbosari Islom Jasimov hamda boshqa bir qator mutassadi vazirlik va idoralar vakillari ishtirokida o‘tkazildi.

Tadbirda ikki mamlakatning qurilish, tibbiyot, kosmetika, tilla buyumlari va texnik jihozlar ishlab chiqarish sohalaridagi ishbilarmon doiralari vakillari ishtirok etdi.

O‘zbekiston Savdo-sanoat palatasi birinchi o‘rinbosari Islom Jasimov o‘z nutqida ikki mamlakat ishbilarmon doiralari o‘rtasidagi uzoq muddatli va o‘zaro manfaatli aloqalar, shuningdek, tadbirkorlik subyektlari faoliyatini qo‘llab-quvvatlash mamlakatlarimiz o‘rtasidagi savdo-iqtisodiy aloqalarni yanada rivojlantirish va mustahkamlashda alohida o‘rin tutishi to‘g‘risida ta’kidladi.

Turkiya Respublikasining O‘zbekistondagi elchisi Olgan Bekar bunday muzokaralar O‘zbekiston va Turkiya o‘rtasidagi do‘stona munosabatlarni mustahkamlashga va ikki davlat o‘rtasidagi iqtisodiy hamkorlik aloqalarini kengaytirishda xizmat qilishi to‘g‘risida ta’kidladi. 

Muzokaralar davomida O‘zbekiston va Turkiya o‘rtasidagi tovar ayirboshlash hajmini oshirishga doir masalalar va savdo-iqtisodiy hamkorlik imkoniyatlari muhokama qilindi. Shuningdek, tomonlar tajriba almashib, tovarlarni eksport va import qilish shartlarini yaxshilashga doir masalalarni ko‘rib chiqdi. 

Ma’lumot uchun, 2023-yilning yanvar-fevral oylari holatiga ko‘ra, O‘zbekiston va Turkiya o‘rtasidagi tovar ayirboshlash hajmi 547,7 million AQSH dollarini tashkil etib, 2022-yilning shu davriga nisbatan 5,7 foizga oshgan.

Muzokaralar natijasida O‘zbekiston va Turkiya o‘rtasidagi hamkorlikni mustahkamlash bo‘yicha kelishuvlarga erishildi. Ikki mamlakat ishbilarmon doiralari vakillari sheriklik munosabatlarini yanada rivojlantirish va hamkorlik yo‘nalishlarini kengaytirishga tayyor ekanliklarini bildirdilar.

SSP matbuot xizmati