“Yangi O‘zbekiston: qulay biznes muhiti” xalqaro sessiyasi bo‘lib o‘tdi

2023 yil 4 iyul kuni Toshkent shahridagi O‘zbekiston Kinematografiya agentligi “Event Hall” tadbirlar zalida O‘zbekiston Savdo-sanoat palatasi tomonidan “Yangi O‘zbekiston: qulay biznes muhiti” mavzusida xalqaro sessiya tashkil etildi.

“Yangi O‘zbekiston: taraqqiyot, innovatsiya va ma’rifat” mavzusidagi xalqaro sheriklik tashabbuslari haftaligi doirasida bo‘lib o‘tgan mazkur tadbirda qator xalqaro tashkilotlar va xorijiy davlatlarning ishbilarmon doira vakillari ishtirok etdi.

Haftalik doirasida o‘tkazilayotgan mazkur tadbirdan asosiy maqsad Yangi O‘zbekistonda biznes yuritishni yengillashtirish, ishbilarmonlik muhitini rivojlantirish borasida amalga oshirilayotgan islohotlarni muhokama qilish, jahon tajribasini o‘rgangan holda ularni amaliyotga tadbiq etish va buning samarasi borasida fikr almashish, keng jamoatchilikni Yangi O‘zbekistonda tadbirkor va investorlarning huquqlarini himoya qilish borasida yaratilgan milliy mexanizm bilan tanishtirishdan iboratdir.

“Ishbilarmonlik muhitini yaxshilash borasida amalga oshirilgan choralar va natijalar” va “Tadbirkorlarning huquqlarini himoya qilish borasida yaratilgan milliy mexanizm” kabi mavzularda o‘tkazilgan mazkur tadbirda so‘nggi yillarda respublikada olib borilayotgan ishbilarmonlik muhitini yahshilashga doir islohotlar mazmuni va sohadagi keng o‘zgarishlar tahliliga atroflicha to‘xtalib o‘tildi, qolaversa, tadbir ishtirokchilari o‘zlarining qiziqtirgan savollariga batafsil javoblar oldi.

O‘zbekiston Respublikasida so‘nggi yillarda tadbirkorlikni rivojlantirish va biznesni qo‘llab-quvvatlashda muhim o‘zgarishlar jarayoni jadal sur’atlarda olib borilmoqda.

Ta’kidlash joizki, 2017-2022 yillarda ishbilarmonlik va investitsiya muhitini yaxshilash maqsadida jami 3 087 ta qonunchilik hujjatlari qabul qilindi.

Tadbirkorlik sohasida 132 ta litsenziya va ruxsat berish tartib-taomillari bekor qilindi. Davlat idoralari tomonidan fuqarolar va tadbirkorlardan jami 73 ta hujjat hamda ma’lumotnomalarni talab qilish amaliyoti bekor qilindi.

Soliq ma’murchiligi soddalashtirildi, soliq yuki qisqartirildi. So‘nggi olti yilda tadbirkorlik subyektlarining soni 6 baravar oshib, bugungi kunda 2 millionga yetdi.

Pandemiya davrida tadbirkorlarni moliyaviy qo‘llab-quvvatlash choralari kuchaytirilib, ularga 86 trln. so‘m kredit, 33 trln. so‘mlik imtiyozlar va boshqa turdagi ko‘maklar ko‘rsatildi.

Tijorat banklari tomonidan hududlardagi 54,9 mingdan ziyod xizmat ko‘rsatish sohasidagi tadbirkorlarga 41,9 trln. so‘m kredit mablag‘lari ajratildi.

Yoshlar tadbirkorligini qo‘llab-quvvatlash maqsadida 120 mingdan ortiq yoshlarga 2 trln. 894 mlrd. so‘mlik, 233 mingdan ziyod xotin-qizlarga oilaviy tadbirkorlik uchun jami 4,7 trln. so‘m miqdorda imtiyozli kreditlar ajratilib, ular tomonidan 200 mingdan oshiq yangi ish o‘rinlari yaratildi.

Tadbirkorlik faoliyatini moliyalashtirish, soliqqa tortish, tadbirkorlik subyektlari faoliyati uchun zarur mablag‘lar va infratuzilma bilan ta’minlash, Soliq va bojxona ma’muriyatchiligini soddalashtirish hamda tadbirkorlik subyektlarining huquqiy himoyasini kuchaytirish masalalari tizimli ravishda davom ettiriladi.

SSP Matbuot xizmati