Oʻzbekiston-Misr ishbilarmonlar kengashini tashkil etish toʻgʻrisida Bitim imzolandi

Joriy yil 31-iyul kuni O‘zbekiston Respublikasi Savdo-sanoat palatasi Raisi Davron Vaxabov va Misr ishbilarmonlar uyushmasi Raisi Ali Xeymi Eissa o‘rtasida videokonferensaloqa formatida uchrashuv bo‘lib o‘tdi.

Shuningdek uchrashuvda O‘zbekiston Respublikasining Misr Arab Respublikasidagi Favqulodda va Muxtor Elchisi Mansurbek Qilichev, Misr Arab Respublikasining O‘zbekiston Respublikasidagi Favqulodda va Muxtor Elchisi Amira Fahmi, Misr ishbilarmonlar uyushmasi ijrochi direktori Muhammad Yusuf, shuningdek, Port-Said shahri senatori Adel El Lamey ishtirok etdi.

Uchrashuv davomida ikki mamlakat ishbilarmon doiralari o‘rtasidagi o‘zaro manfaatli hamkorlikni kengaytirishning mumkin bo‘lgan yo‘nalishlari, jumladan, hamkorlikning istiqbolli yo‘nalishlarini o‘rganish bo‘yicha ishchi guruhlarni shakllantirish, qo‘shma biznes-forumlar, o‘zaro tashriflar tashkil etish taklifi muhokama qilindi.

Uchrashuv yakunlari boʻyicha Oʻzbekiston Savdo-sanoat palatasi va Misr ishbilarmonlar uyushmasi o‘rtasida O‘zbekiston-Misr ishbilarmonlar kengashini tashkil etish to‘g‘risidagi Bitim imzolandi.

SSP Matbuot xizmati