Gamburg shahrida “Germaniya-Yevroosiyo o‘rta biznesi” ikkinchi forumi bo‘lib o‘tdi

Joriy yilning 26 sentyabr kuni Gamburg shahrida O‘zbekiston Savdo-sanoat palatasi raisi Davron Vaxabov ishtirokida “Germaniya-Yevroоsiyo o‘rta biznesi” ikkinchi forumi bo‘lib o‘tdi.

Mazkur forum Germaniya-Yevroosiyo ishbilarmonlar uyushmasi tomonidan tashkil etilgan bo‘lib, Germaniya va MDH davlatlari o‘rtasida savdo-iqtisodiy sohada ikki tomonlama hamkorlikni yo‘lga qo‘yishga qaratilgan.

Germaniya-Yevroosiyo biznes assotsiatsiyasi Germaniyaning MDH mamlakatlarida faoliyat yuritayotgan 200 dan ortiq o'rta va kichik kompaniyalarini birlashtiradi.

Germaniyaning 150 dan ortiq kompaniyasi rahbariyati ishtirok etgan tadbirda O‘zbekistonning savdo-iqtisodiy sohadagi salohiyati namoyish etildi. Germaniya tadbirkorlik subyektlarining ishlab chiqarish quvvatlarini mamlakatimizga ko‘chirish borasida mamlakatimizning imkoniyatlariga alohida e’tibor qaratildi.

Tadbir yakunlari bo‘yicha tomonlar joriy yilning 7-11 noyabr kunlari Germaniya-Yevroosiyo o‘rta biznes uyushmasi rahbariyati boshchiligidagi 100 ga yaqin nemis biznes vakillarining  O'zbekistonga tashrifini amalga oshirishga kelishib oldilar.

Ushbu tashrif doirasida Toshkent shahridagi sanoat zonalari, shuningdek, Toshkent va Samarqand viloyatlariga tashrif uyushtirish belgilandi.

SSP matbuot xizmati